6.06.2010

وقّف يا زمن...


محمود درويش قال إنو ما بحب من الحب غير البدايات...
وأنا هيك...
في أحلى منا بدايات الحب؟ أول بوسة..أول ضهرة..أول ضحكة وأول نكتة وأول مشوار...
وبدايات الحلم...أول مرة حلمنا فيا، كل واحد لحالو، بالحلم الكبير، بالشهرة، بتغطية الحروب ...أول مرة حلمنا سوا وما كان العالم سايعنا ببت، بعيلة، وبجنينة يلعبوا فيا الولاد ...أول مرة حلمنا كلنا سوا بساحات عشقت بوقتا الحرية..أول مرة حلمنا ببلد حدودو حدود سما بعدا لهلق...مش ملك حدا!
وبدايات التنفيذ..أول مرة كتبت فيها مقالة، أول صورة أخدتها، أول خريطة مشروع نفذتا، أول لوحة رسمتها...مع كل أول إحساس رافق أول مرة...

في أحلى منا بدايات تحدّي الزمن والركض معو وعكسو ...أول مرة سبقك الباص، أول مرة وصلت متأخر عموعدك..أول مرة وصلت فيا بكير على موعد غرام...أول مرة مشيت بشارع الحمرا عكس كل السيارات...يللي بدورها عم بتسابق الوقت...
بس لو كل هالبدايات فيا تضل بدايات...وما تصير نهايات خاطفة...كنا يمكن جمدنا الزمن تضل بداية البدايات مش النهايات...

No comments: