ستي، اشتقتلك. ما عم اقدر اتعود على فكرة غيابك وما بعرف مين منا رح يقدر.
ستي، حاسة حالي عم دورع أرض عم بتدور
فيني وتبرم.
ستي، كل همي انو احكيكي لمرة أخيرة،
أنو لمرة وحدة بس جرب دق بإيديكي يللي حافظة الشرايين يللي فيون شريان ورا شريان.
مرة وحدة لقلك انو مش عم اقدر اتصرف
بكل تفاصيل حياتنا سوا.
مش عم اعرف شو أعمل بتلفون الصبح
وتلفون الضهر وعشية وكل الوصفات يللي كنت
أعرف أعملها بس حب دق أسألك عنها، عن لون الحمرا يللي بحطو، ولون شعري يللي بصبغو،
والهدايا يللي بجيبا وشو قول لإمي إذا زعلت مني شي مرة.
مرة وحدة لقلك إني اشتقت لريحة الكريم
يللي ع ايديك ولطريقة استقبالك إلي وقتا طل من الباب. اشتقت تقوليلي " يا
حشيشة قلبي" وتغمري مجد بحب ما شفت حدا قدملو ياه بحياتي.
مرة وحدة لقلك اني اشتقت نضحك سوا.
نضحك تنبكي من الضحك ع خبارنا.
مرة وحدة لقلك في صقعة رهيبة بجسمي من
أول ما فليتي. واني اشتريت جاكيت بتدفي متل ما قلتيلي.
مرة وحدة تقلك إني مشتاقة لكل
هالتفاصيل ولتفاصيل حياتنا سوا من 35 سنة لليوم.
ستي، يا ريت فيكي تردي علي بس لمرة
وحدة وتقوليلي متل ما كنتي تقوليلي على طول: الناس بينسو ستي. عطول بينسو.
بس ستي، انا ما فيني انساك ولا رح
اقدر ويللي أكيدة منو إني ما رح انسى كل هالتفاصيل الصغيرة من حياتنا سوا.
مرة
وحدة بس ستي!
